கிழக்கின் அதிகாரத்தைக் கைப்பற்ற சுதந்திரக்கட்சி களத்தில்-இராஜாங்க அமைச்சர் ஹிஸ்புல்லாஹ் தெரிவிப்பு

0
50

slfp4(ஆர்.ஹஸன்)
“கிழக்கு மாகாண சபைத்தேர்தலில் ஸ்ரீலங்கா சுதந்திரக்கட்சி தலைமையிலான ஆட்சியொன்றை அமைப்பதற்குத் தேவையான வியூகங்களையும், கலந்துரையாடல்களையும் நாங்கள் முடுக்கி விட்டுள்ளோம். சுதந்திரக்கட்சி மைத்திரி அணி, மஹிந்த அணி என இரண்டாகப் பிளவுபட்டுப் போட்டியிட்டால், அது எமக்குப்பாதகமான விளைவுகளை ஏற்படுத்தும்.

எனவே, கிழக்கு மாகாண சபையின் ஆட்சியதிகாரத்தைக் கைப்பற்றுவதற்காக இரு தரப்பும் ஒற்றுமைப்பட்டு செயலாற்றவுள்ளோம்”  என  ஸ்ரீலங்கா சுதந்திரக்கட்சியின் முஸ்லிம் சம்மேளனப் பிரதித்தலைவரும், புனர்வாழ்வு மற்றும் மீள்குடியேற்ற இராஜாங்க அமைச்சருமான எம்.எல்.ஏ.எம்.ஹிஸ்புல்லாஹ் தெரிவித்தார்.

ஸ்ரீலங்கா சுதந்திரக்கட்சியின் முஸ்லிம் சம்மேளனக்கூட்டம் அதன் தலைவர் இராஜாங்க அமைச்சர் ஏ.எச்.எம். பௌசி தலைமையில் நேற்று செவ்வாய்க்கிழமை மாலை கட்சியின் தலைமையகத்தில நடைபெற்றது.

இந்நிகழ்வில், வடமாகாண ஆளுனர் ரெஜினல் குரே, முன்னாள் சிரேஷ்ட அமைச்சர் அதாவுத செனவிரத்ன, கிழக்கு மாகாண சபையின் முன்னாள் முதல்வர் நஜீப்.ஏ.மஜீத், நாடாளுமன்ற உறுப்பினர் காதர் மஸ்தான் உள்ளிட்ட ஸ்ரீலங்கா சுதந்திரக்கட்சியின் மாகாண சபை, உள்ளூராட்சி மன்ற முஸ்லிம் உறுப்பினர்கள் பலரும் கலந்து கொண்டிருந்தனர்.

இந்நிகழ்வில் உரையாற்றும் போதே இராஜாங்க அமைச்சர் ஹிஸ்புல்லாஹ் மேற்கண்டவாறு தெரிவித்தார்.

அவர் அங்கு மேலும் கூறியதாவது:-
பதவிக்காலம் நிறைவடையும் கிழக்கு மாகாண சபை உள்ளிட்ட மூன்று மாகாண சபைகளினதும் நிர்வாகக்காலத்தை நீடிக்காது, அதனை கலைத்து விட்டு மாகாண சபைத்தேர்தலை உரிய நேரத்தில் நடத்த ஸ்ரீலங்கா சுதந்திரக்கட்சி தீர்மானித்துள்ளது. அது தொடர்பில் பிரதமர் ரணில் விக்கிரமசிங்கவுக்கும் எடுத்துரைத்துள்ளோம்.

எனவே, நாங்கள் விரைவில் எதிர்கொள்ளவுள்ள மூன்று மாகாண சபைகளுக்குமான தேர்தலுக்குத் தயாராக வேண்டும். இத்தேர்தலானது, ஸ்ரீலங்கா சுதந்திரக்கட்சியின் முஸ்லிம் வேட்பாளர்களுக்கு மிகுந்த சவால்மிக்கதாக அமையும். சவால்களை முறியடித்து எவ்வாறு வெல்வதென்பது குறித்து நாங்கள் இப்போதே ஆராய வேண்டும்.

ஸ்ரீலங்கா சுதந்திரக்கட்சி மஹிந்த அணி, மைத்திரி அணி எனப்பிரிந்துள்ளமை இரு தரப்பு முஸ்லிம் வேட்பாளர்களுக்கும் பாதிப்பாக அமையும். அத்துடன், நாட்டில் தலைதூக்கியுள்ள இனவாதச்செயற்பாடுகளினால் வடகிழக்கு மாகாணங்களுக்கு வெளியே சு.கவில் போட்டியிடும் முஸ்லிம் வேட்பாளர்களுக்கு பெரும்பான்மை மக்களின் வாக்குகளைப் பெறுவதென்பது கடினமானதாகும்.

கிழக்கு மாகாண சபை உருவாக்கப்பட்ட பின்னர் முதல் இரண்டு மாகாண சபைகளையும் ஐக்கிய மக்கள் சுதந்திர முன்னணியே ஆட்சியைக் கைப்பற்றியது. எனினும், துர்திஷ்டவசமாக தற்போது அதிகமான ஆசனங்களை நாங்கள் வைத்திருந்தும் எதிர்க்கட்சியிலேயே அமர்ந்துள்ளோம்.

சவால்கள் நிறைந்த எதிர்வரும் கிழக்கு மாகாண சபைத்தேர்தலில் ஸ்ரீலங்கா சுதந்திரக்கட்சி தலைமையிலான ஆட்சியொன்றை அமைப்பதற்குத் தேவையான வியூகங்களையும், கலந்துரையாடல்களையும் நாங்கள் முடுக்கி விட்டுள்ளோம்.

கிழக்கு மாகாணத்தில் மஹிந்த அணி, மைத்திரி அணி எனப்பிளவுபட்டு போட்டியிடப்போவதில்லை. அவ்வாறு போட்டியிட்டால், அது எமக்குப்பாதகமான விளைவுகளை ஏற்படுத்துமென்பது அனைவருக்கும் தெரியும். இரு அணிகளையும் இணைத்து கிழக்கு மாகாண சபைத்தேர்தலை எதிர்கொள்வது சம்பந்தமாக ஆராய்ந்து வருகின்றோம்.

இதே வேளை, உள்ளூராட்சி மன்றத்தேர்தலும் தொகுதிவாரி முறையில் விரைவில் நடத்தப்படும். அதற்குத் தேவையான சகல ஏற்பாடுகளும் செய்யப்பட்டு வருகின்றன. தொகுதிவாரி முறையில் தேர்தலை நடத்துவதற்கான யோசனை அடுத்த வாரம் நாடாளுமன்றத்தில் நிறைவேற்றப்படும். அதன் பின்னர் எந்த நேரத்திலும் தேர்தல் அறிவிக்கப்படலாம். எனவே, நாங்கள் அதற்கான தயார்படுத்தல்களையும் மேற்கொள்ள வேண்டும்  என்றார்.

LEAVE A REPLY

Please enter your comment!
Please enter your name here